’யூத்’ பட விமர்சனம் - விமர்சிப்பவர் சென்னை பத்திரிகா சிவாஜி

’யூத்’ பட விமர்சனம் - விமர்சிப்பவர் சென்னை பத்திரிகா சிவாஜி

10ம் வகுப்பில் ஜஸ்ட் பாஸாகும் கென் கருணாஸுக்கு, அவரது அம்மா தேவதர்ஷினி மிகவும் கஷ்ட்டப்பட்டு 11ம் வகுப்பு சீட் வாங்கி கொடுக்கிறார். ஆனால், அங்கும் படிப்பில் கவனம் செலுத்தாமல் காதல் மீது கவனம் செலுத்தும் கென் கருணாஸ் பார்க்கும் பெண்கள் மீது காதல் வலை வீசுகிறார். மகன் உறுப்பட மாட்டான் என்ற நம்பிக்கையோடு தந்தை சூரஜ் வெஞ்சரமோடு இருந்தாலும், அவரது தாய் தேவதர்ஷினி தன் மகன் நிச்சயம் பெரியாளாகி விடுவான் என்ற நம்பிக்கையில் இருக்கிறார்.

ஆனால், பெற்றோரின் நம்பிக்கை மற்றும் அன்பை புரிந்துக் கொள்ளாத கென் கருணாஸ், படிப்பின் மீது கவனம் செலுத்தாமல் காதல் மீது கவனம் செலுத்த, 12ம் வகுப்பு முடிப்பதற்குள் மூன்று காதல்களை கடக்கிறார். ஒரு கட்டத்தில் காதலை விட வாழ்க்கைக்கு முக்கியம் படிப்பும், குடும்பமும் தான் என்பதை அவருக்கு புரிய வைக்கும் சூழல் அமைகிறது. அந்த சூழல் அவரது வாழ்க்கையை எப்படி புரட்டிப் போடுகிறது, அதன் மூலம் அவரது வாழ்க்கை எப்படி மாறுகிறது, என்பதை கலர்புல்லாகவும், யூத்புல்லாகவும் சொல்வது தான் ‘யூத்’ படத்தின் கதை.

துள்ளல் நடிப்பு மூலம் படம் முழுவதும் செம எனர்ஜியாக வலம் வரும் கென் கருணாஸ், காதல், காமெடி, செண்டிமெண்ட், நடனம் என அனைத்து ஏரியாவிலும் சிக்ஸர் அடிக்கிறார். அவரது உடல் மொழி மற்றும் மேனரிசம் அனைத்தும் ரசிக்கும்படியாக இருப்பதோடு, பள்ளி மாணவர் கதாபாத்திரத்தை கச்சிதமாக கையாண்டு படத்திற்கு பெரும் பலமாக பயணித்திருக்கிறார்.

அனிஷ்மா அனில்குமார், மீனாட்சி தினேஷ், பிரியான்ஷி யாதவ் என மூன்று நாயகிகளும் காதல், குறும்பு, அன்பு என்று மூன்று விதமான உணர்வுகளை வெளிப்படுத்தி படத்திற்கு பலம் சேர்த்திருக்கிறார்கள்.

நாயகனின் தந்தையாக நடித்திருக்கும் சூரஜ் வெஞ்சரமோடு தனது எதார்த்தமான நடிப்பின் மூலம் மகன்கள் மீதான அக்கறையை மனதில் வைத்துக்கொண்டு முகத்தில் கோபத்தை வெளிக்காட்டும் அப்பாக்களை பிரதிபலித்திருக்கிறார்.

நாயகனின் அம்மாவாக நடித்திருக்கும் தேவதர்ஷினிக்கு வழக்கமான அப்பாவித்தனமும், அளவில்லா அன்பும் கொண்ட அம்மா கதாபாத்திரம் என்றாலும், அதை நிறைவாக செய்து பார்வையாளர்கள் மனதில் இடம் பிடிப்பதோடு, இளைஞர்களுக்கு அவர்களது அம்மாக்களை நினைவுப்படுத்தி விடுகிறார்.

நாயகனின் நண்பர்களாக நடித்திருக்கும் அனைத்து நடிகர்களும் எனர்ஜியோடு நடித்திருக்கிறார்கள். அவர்களது உடல் மொழி மற்றும் டைமிங் வசனங்கள் படத்தை கலகலப்பாக நகர்த்தி செல்ல பெரிதும் உதவியிருக்கிறது.

படத்தின் தலைப்புக்கு ஏற்றவாறு காட்சிகளை யூத்புல்லாகவும், கலர்புல்லாகவும் காட்சிப்படுத்தி படத்தை ரசிக்க வைத்திருக்கிறார் ஒளிப்பதிவாளர் விக்கி. ஜி.வி.பிரகாஷ் குமாரின் இசையில் பாடல்கள் அனைத்தும் துள்ளல் ரகம். ஏற்கனவே ஹிட்டான பாடல்களை காட்சிகளோடு பார்க்கும் போது புதிய உற்சாகம் பிறக்கிறது. பின்னணி இசை திரைக்கதை தொய்வில் இருந்து மீட்டெடுக்க பெரிதும் கைகொடுத்திருக்கிறது. நாஷின் படத்தொகுப்பு மற்றும் ராமு தங்கராஜின் கலை இயக்கம் இரண்டும் படத்திற்கு பலமாக பயணித்திருக்கிறது.

இளைஞர்களுக்கான ஒரு கதையாக இருந்தாலும், அதை மிக நாகரீகமாக கையாண்டிருக்கும் கென் கருணாஸ், பெற்றோருக்கும், பிள்ளைகளுக்கும் இடையிலான புரிதல் மற்றும் செண்டிமெண்ட் காட்சிகளை மிக சிறப்பாக கையாண்டு, இளைஞர்களுக்கான ஒரு கதையை அனைத்து தரப்பினருக்குமான படமாக கொடுத்திருக்கிறார்.

இயக்குநர் மற்றும் நாயகனாக பயணித்தாலும், தன் கதாபாத்திரத்தை எந்த இடத்திலும் தனித்துவம் படுத்தாமல், திரைக்கதையை மட்டுமே முன்னிலைப்படுத்தி படத்தை நகர்த்தியிருக்கும் கென் கருணாஸ், மற்ற கதாபாத்திரங்களுக்கு முக்கியத்துவம் கொடுத்து படத்தை கலகலப்பாக நகர்த்தி செல்கிறார்.

காதல் தான் வாழ்க்கை, என்ற மனநிலையில் பயணிக்கும் இளைஞர்களுக்கு படிப்பும், குடும்பமும் தான் முக்கியம் என்ற அறிவுரை சொல்லும் கதையை, எந்தவித தொய்வின்றி ஆரம்பம் முதல் முடிவு வரை, கலகலப்பாக நகர்த்தினாலும், பார்வையாளர்களின் மனதுக்கு நெருக்கமான விசயங்களை வைத்து சிரிக்க வைப்பது மட்டும் இன்றி சிந்திக்கவும் வைத்திருக்கிறார் இயக்குநர் கென் கருணாஸ்.

இந்த சிறு வயதில், இளைஞர்களுக்கான ஒரு பொழுதுபோக்கு படமாக மட்டும் இன்றி, அதை பெரியவர்களுக்கும் பிடித்த வகையில் கையாண்டு ’யூத்’ படம் மூலம் தமிழ் சினிமாவில் இயக்குநர் மற்றும் நாயகனாக வெற்றி முத்திரை பதித்திருக்கும் கென் கருணாஸுக்கு சென்னை பத்திரிகாவின் வாழ்த்துகளும், பாராட்டுகளும்.